FADE KLÚBBUR - INNBLÁSTUR
Þegar litir blandast áreynslulaust úr einum í annan, FADE!
Það er sannarlega úr mörgu að velja ef þú vilt prjóna flík sem er í fleiri en einum lit en er samt ekki röndótt.
Ef þú vilt gúgla eða leita eftir hugmyndum á netinu, instagram, pinterest, Ravelry eða hvar sem er þá er ágætis að nota orðið „fade“, „faded knitting“ og „marled knitting“. Hjálplegt að setja myllumerki fyrir framan orð á samfélagsmiðlum.
Hér á síðunni eru nokkrar myndir ætlaðar til innblásturs og allt safnið af því sem ég hef týnt saman má finna á Pinterest síðunni minni.
Hvernig blanda ég liti með garni?
Sem dæmi má blanda litum saman eftir þessari formúlu, gefið að búið sé að fitja uppá og prjóna með lit A:
- Prj. 1 umf. með B
- Prj. 3 umf. með lit A
- Prj. 2 umf. með lit B
- Prj. 2 umf. með lit A
- Prj. 3 umf. með lit B
- Prj. 1 umf. með lit A
- Prj. áfram með lit B
Hér má auðvitað leika sér með hversu langt litur á að ná inná annan lit og lengja bilið á milli umferða með nýjum lit og láta þar með litskiptin sjálf ná yfir lengri kafla í prjónlesinu.
Prjónað fram og til baka
Ef þú ert að prjóna stykki fram og til baka notarðu sléttar tölur, 2 umf. lit B, 4 umf. lit A og svo framvegis.
Einn grunnlitur og fylgiþráður í mismunandi lit
Í verkefnum þar sem unnið er með tvo þræði er hægt að ná fram mjög aflíðandi litskiptum með því að hafa annan þráðinn í einum lit yfir allt verkefnið en hinn þráðinn í mismunandi lit.