Undirbúningur fyrir Prjónagleði

Prjónagleðin er eftir örfáa daga! Þar verður Garntorg og hvorki meira né minna en 30 söluaðilar. Verður algjör veisla. Datt í hug að setja hér inn smá lista yfir praktíska hluti sem geta kannski hjálpað þér við að framkvæma góð garnkaup. Bara svona þumalputtareglur.

Garn í fingering grófleika er oftast fyrir prjóna 2.25mm – 3.5mm
Í 100g af fingering garni er algengt að séu frá 360 – 425m eða 180 – 212m á 50g hespu/dokku/hnotu.
Munurinn á garni í fingering grófleika (sem þú getur einkennt á t.d metrafjölda í 100g eða skráðri prjónastærð) sem heitir eitthvað fingering eða eitthvað sock (eins og hjá mér, Merino Fingering og Merino Nylon Sock) er að í garni sem heitir „…sock“ er nylon eða einhver styrking og þessvegna hentar það vel í sokka. Sokkagarn, sem er merkt „…sock“ er líka að finna í öðrum grófleikum.
Úr einni 100g hespu af garni í fingering grófleika, sem er styrkt (með nyloni t.d) má hæglega gera sokkapar á fullorðna manneskju. Jafnvel ná tveimur pörum, eitt par á kvenmann og eitt par á barn. Eða tvö pör með stuttu stroffi.
Kaup á tveimur 100g hespum af garni í fingering grófleika henta vel í sjal sem þú veist ekki ennþá að þú ætlar að prjóna. Það geta verið tvær eins hespur eða tvær í sínhvorum litnum.
Garn í DK grófleika er oftast fyrir prjóna 3.5mm – 4.5mm
Í 100g af DK garni er algengt að séu frá 210 – 225m eða 100 – 112m á 50g hespu/dokku/hnotu.
Ein 100g hespa af garni í DK grófleika dugar í eitt sokkapar, vettlinga, eina til tvær húfur, mörg eyrnabönd.
Hve mikið garn í peysu – hér er listi yfir áætlað garnmagn í peysuprjón m.v hvort um ræðir peysu á barn, konu eða karl og eftir grófleika.

Eitt sem ég hef tekið eftir þegar ég afgreiði garn er að í stórum dráttum er kaupandinn annaðhvort mjög undirbúinn og veit í hvað er verið að kaupa, eða hann er (eins og ég) með öllu óundirbúinn og laðast frekar að því að kaupa garn fyrst og finna því verkefni seinna. Ég tel báðar aðferðir fullkomnar!

Ef hinsvegar þú ert með eitthvað ákveðið í huga, gæti verið gott, að vera búin að skoða uppskriftina og skrifa ef til vill hjá sér eftirfarandi:

Nafn uppskriftar og hvar hana er að finna (Ravelry, vefsíðu, á miða í veskinu þínu)
Valin stærð
Uppgefið garn (svo hægt sé að fletta því upp ef það á að kaupa annað en uppgefið garn)
Metrafjöldi á grömm í uppgefnu garni (hjálpar til að reikna út hve mikið þarf af öðru garni en gefið er upp)
Uppgefin prjónastærð (hjálpar til að reikna út hve mikið þarf af öðru garni en gefið er upp)
Prjónfesta

Hlakka síðan til að sjá þig á Prjónagleðinni/Garntorginu!

Það er Kristín sem ritar - lýsandi stikkorð:

handlitari + vefhönnuður + útgefandi // listrænn stjórnandi + fjölástríðufullur prjónari // þverflautuleikari + tilfallandi klúðrari // fylgjumst að á Insta @vatnsnesyarn.kristin